Col 4 | AMP | STEP | Niko hingrna yimaroh tohak yimako, niko tu hifa dborioh nefm hingrna yimam yak nuhaskfot. Niko dukaf hanykfot nikmoh tohak yimar to yura hefenr tohwor.

Colossians 4

1 Niko hingrna yimaroh tohak yimako, niko tu hifa dborioh nefm hingrna yimam yak nuhaskfot. Niko dukaf hanykfot nikmoh tohak yimar to yura hefenr tohwor.

Kfo bruttnanefti yau marnyaneft

2 Kfo bruttnaneft yafho thu duha. Yihof href kfo bruttna hasokfot. Duka yima yuhum Bro Nkifrarpar yi bugahato duka hik bohik buga, ee, kfo bruttna-kfot. Kfo bruttnahato Bro Nkifrar kfo yindhorkfot. 3 Nmoh hingrna nmbuham ndm kfo bruttnakfot. Bro Nkifrar wakfo bruttnakahtkomr Kraisrhu mrokfom kfo pthayuk yihotam yak hta bohtarahrm. Nd Kraisrhu kafrohet mrokfot rhumoat, be tafont kfo ptharuhatnomt tuhant yindars wanyrahmt. Na nd nmbuhatpno yakmoma kalabus htamoma. 4 Wakfo bruttnakahtkma nd kafrohet mrokfeft tu Bro Nkifrar dukewa dukef yuhatn kfo hikrhotant wany hik bohikrahmt.

5 Kristennom tohwa tkitm tom Jisasrhu mrokfom hik duha yimam tom rpat tohwonom, ndnettn nikmoh tamoh mrokfo pthanefm ptha marnya-kfot o toh nmbuham be dborioh dukefmpno toh marnyakfot. Nd Jisasr hik duha yimam nikmoh pthefm o toh nmbuham mhtiyakruhamn Jisasr mhikaknirahmr. 6 Tamoh tamoh mrokfom niko pthayukm be dborioh mrokfom pthakfot. Mrokfom be kfo yima boyima marnyakfot.

Porr kfo tkrurmotrf Tikikus Onesimusrof yimof Kolosiko

7 Tikikusrn kfo nuhas hik bohik-rahrko na hingrnewa hingrna yuharoh mrokfom. Tikikusr nmoh nanyma kmi thofer. Nmoh Nungothet Jisasrhu hingrneft rorpno rpat hingrnewunomt. Rorhu hingrneft, awi, hifa. 8 Nmoh toh nmbuhat asha tohwat rorpno wawanyswako. Ror niahato kfo bmta mrokfom kfo hirahrko. 9 Nikmoh kmi thof Onesimusrpno rpat nierahf. Onesimusr nhaf nmoh dborioh yimatemer. Nompno rpat tohwor. Rofn kfo nuhas hik bohikrahfko nmoh toh nmbuhat yo nompno yorhwa nefm.

Porr kfo yindhor mrokfot Kolosimpno yimot

10 Aristarkusr nanpno rpat kalabus tohwonom. Ror dukewarko kfo yindhor mrokfot htefiwurt. Yo Makr, Barna-basrhu rahemr, ror to rpat tohwanomn rorn wom kfo yindhor mrokfot htefiwurt. Fitoh yiha Makr nikmoha niewur, na kfomo yuhatn wahikkah-komn wayindhoraktwakomr. 11 Yo Jisasr, wom yufat kutewumr Jastasr, rorn nhaf wom kfo yindhor mrokfot htefiwurt. Juda yimam na hingrna-nuhiwam, to nd nd yimarpam hingrnanuhiwuma. Bro Nkifrarhu yinhit tohwa yuhathu mrokfot, hifa nd nd yimampno kfo nuhas hanitnomt kmi kmim.

12 Nikmoh kmi thof Epafrasrn wom kfo yindhor mrokfot htefiwurt. To nd Epafrasrn tor niko hingrnanuhiwa yimatr. Yiha yiha nd yimar nikmoh yufam yutewarko kfo bruttnewur. Nhai wom yihar rhu furakahrr. Kangr, “Bro Nkifrar akfo bruttnakahtanr, rroh Kristen toh nmbuhat toh bmtaruhamn mirahm nko fitoh dfikrhof Kristenem.” 13 Ror niko dukewarn yihof href yihof href kfo bruttna hasiwurko. Niko duka, yo Laodisiathu Kristenm duka, yo Hierapolishu Kristenm duka, nhai rhu witakahr kfo bruttnaneft. 14 Yo nmoh yimatem Lukr, nd dokta hingrneft yakitohwar, rori Demasr wom kfo yindhor mrokfot htefiwurt.

15 Na tukanhu kfo yindhor mrokfot wakfohitwokma Laodisiat tohwa Kristenmpno. Yo wom kfo yindhor mrokfot wakfohitwokma Nimfati rothu kunys yi rifinywa Kristenmpno. 16 Niko Kolosi thofko ndar gontwat waritimnikahkomt tfit Laodisia thofm wahekahtko rroh sios ritimrahmt. Yo Laodisiathu yufatpno yiyuk gontwat Laodisiathu sios aritimnikahmtn tfit Kolosi thofm ahekahtm rroh sios ritimrahmt. 17 Arkipusruhet ndar mrokfo nmbuhat. “Ni Arkipuse, ni Brorpno yakmo hingrnafat mirahn amyafhoniyant. Nd hingrnafat wayakitoh marnyakahnt wahingrna marnyetwant.”

18 Na Pora ndar gontwat wandfahato kfo yindhor mrokfot htefiwanko. Mirahko aduka mmonomr na kalabus tohwohat. Bro Nkifrar ayak marnya bomarnyatwarko.

Be injirpa mrokfom.